Mr mache dicht aber ....
 |
(E Päggli Ricola) Mr mechte doo an Sepp Blatter dängge und ihm e Päggli Ricola schängge. Die Krütterdääfy hälfen offebaar by Hueschte, Haiserkait und „Katar“. |
 |
(?!) Ohny Hilf – ganz frei – uff Zwanzyg zelle … E Ricola uss em Papyyrli schelle … Erkenne, isch dr Angge frisch oder ranzyg … Das wär dr Lehrplaan ainezwanzyg! |
 |
(E Tuube Ricosyl) Mir hän probiert, ebbs kennty nutze, geege Akne und Byybeli e Ricola z schlutze … S nutzt nyt … geege d Byybeli am Buch und Arsch, solang d no VW-Diesel fahrsch! |
 |
(E Zyylschyybe) My Helgeträäger und ych – ou si, s isch gschpunne! Hän bymne Ricola-Wettbewärbli gwunne! „Ein Männer-Seminar“ isch dr erschty Gwinn … syt dert wisse mr, dass mr Männer sin! |
 |
(E Kueh und e Nuggi) Wo dr Brunner Toni maint: „S isch gnue! Ych gang wider haim zu Frau und Kueh …“ han ych ihm grad e Ricola gschänggt! Wills en vom Blocher-Nuggi-Entzug ablänggt! |
 |
(E Dööfy) Bisch gaischtyg „nüt“ oder sogar no „nütter“… do hälfe au kainy Ricola-Krütter! Schloo dr drum e Karrieere ussem Sinn! … guet … s liggt no „Bolyzey-chef“ drin … |
 |
(E Liiferwaage) Bisch Liferant vommene Krütter-Garte und muesch für s Liifere in dr Altstadt warte? Syg frooh, isch s Muul dangg Ricola voller, denn wird s Warte bym Spaalebärg-Poller toller! |
 |
(E Apytheek-Kryz) Bisch haiser und kasch nid rächt schwätze, wär e Ricola villicht nid s Lätze! Bym Schneider-Ammann dien mir druff wette, kasch au mit Ricola nyt me rette! |
 |
(Noochvärs) Vo wääge Ricola ... ych waiss, s bruucht Muet, die wääre au fir dr PEGIDA guet! Denn giengt by däm, wo me by däne schnuurt, zmindescht dr bruuny Mundgruch furt! |
| (Noochvärs) Si warte sicher fidiralala uf e letschte Värs zu Ricola. Soone Widerholyg kunnt nid! – es duet ys laid! Will uff „Widerhoole“ hets Tele-Basel Copy-Right! |
Und yyneschtäche, ummeschloh.
Duurezieh und aabeloh.
Jä soone Refrain isch dr Hit…
…nur fir e Nationaalroot längt das nit!
Duurezieh und aabeloh.
Jä soone Refrain isch dr Hit…
…nur fir e Nationaalroot längt das nit!