Vo Aafang aa simr als "Wildy" uff d Gass, hän vorallem d Käller und d Perypherie-baize als unser Revier entdeggt und hänn ys derten usstobt.

Zerscht simmr säbt z Viert gsi. Miteme Goschdym a la Mozart. Aber scho bald ischs Grippli uff 2 gschrumpft. Aafänglig zwai Schtimmen und ai Instrumänt, bzw Helge. Die jetzyge Goschdym hämmr, syt mr in dr Zämmesetzyg "Eergeli und Sänger" plus "Helgedrääger" unterwäggs sin.

Au wenn dr Vordraag mittlerwyyle nur vo ainere Persoon zum Beschte gäh wird, hämmr dr Namme "die Antiquierte" in dr Mehrzaahl gloh! Aynersyts, will dr Helgedrääger nit unwäsentlich uff d Bängg Yyfluss nimmt und will dr Helgedrääger in synere angaschyerten Art erscht d Bängg so richtyg zum Gälte bringe tuet!

Noodynoo het men ys aafoo kenne und schetze, esoo, ass mr au als Wildy und Freyy fir Stubete, Fäärnseh, Raadio und Cliquenaläss aagfrogt worde sinn.

Wild und frey bedytted, ass mr kainere Schnitzelbanggorganisatioon aagheere dien, sondern ass mr sälber Route, Zytte und Duur dien wähle. Nit, dass mr ebbys geege die organisyerte Bängg hätte! Aber mr sin allne Aafrooge vo de Comiteeler, VSGler, BSGler, Bängg fir Basel und Comitee2000 ussgwiche, wills halt nit Scheeners git als d Freyhait, als Wilde aifach emol naymen aanesitze z kenne, e Pause z mache und em Fasnachtstryybe uff dr Gass zu z luege!

Dr Noodail drby isch, ass mr kai Gäld bykemme fir d Helge, Goschdym und Larve und ass mr (das isch Ehresach) de organisierte Bängg dr Vordritt leehn, wenn sy naimets mien aastoh (sunscht sin sy im Hinterdräffe uff dr Stämbbel- und Unterschriftejagd). E wyttere Noodail isch, ass den als Wilde kai Unterstitzyg vomene Verayn hesch, wo dy portyere tuet! Muesch dr also dyny Spoore sälber abverdyene!